|
Sco part dal project quadriling "Cirque des idées" ha la Rumantschia mussà sia diversitad sin ina moda moderna ed allegraivla. Durant nov fins d'emna è la Rumantschia sa preschentada ensemen cun ils auters partenaris dal "Cirque des idées" sin trais differents arteplages. In ferm accent ha la Rumantschia dà ils 29 da zercladur a Biel/Bienna cun il "Festival da musica rumantscha" e la represchentaziun da la cover-show rumantscha "PRISAS-REPRISAS-SURPRISAS". Quest project ch'è vegnì preschentà a l'Expo.02 sut il titel "Carte postale" ha attratg in grond public poliglot che s'ha laschà fascinar da la musica rumantscha.
Grazia al generus sustegn finanzial da la Fundaziun Vontobel da Turitg ha la Rumantschia pudì participar activamain a l'Expo.02. Avrì las portas tar la Fundaziun Vontobel ha il cusseglier naziunal grischun Duri Bezzola. La Rumantschia ha profità da la chaschun ed ha elavurà en curt temp in program attractiv che ha purschì al rumantsch ina buna plattafurma a l'Expo.02.
En general ha il rumantsch cuntaschì ina buna preschientscha a l'Expo.02. La preschientscha vesaivla dal rumantsch tar l'infurmaziun e la signalisaziun da l'Expo.02 ed en las exposiziuns è per gronda part fitg buna. Il rumantsch sa preschenta a moda natirala sper - tscha e là perfin avant - las autras linguas. Ina normalitad linguistica ch'ins manchenta savens en auters lieus.
La preschientscha plaschaivla dal rumantsch a l'Expo.02 è tranter auter dad attribuir a l'engaschi dal chantun Grischun e da la Lia rumantscha. La fin da l'onn 2000 ha l'uniun exposiziun naziunala fatg in contract cun il chantun Grischun e la Lia rumantscha per garantir ina preschientscha commensurada dal rumantscha a l'Expo.02. En quest contract èn l'Expo.02 ed il chantun sa cunvegnids da surpigliar mintgamai in terz dals custs per las translaziuns rumantschas. La Lia rumantscha ha prestà ses terz en furma da translaziuns. En il rom da questa cunvegna èn vegnids realisads pliras broschuras, l'entira preschientscha da l'Expo.02 sin l'internet, la signalisaziun e blers auters texts rumantschs ch'ins chatta sin ils arteplages a l'Expo.02. Independentamain da quai ha il servetsch da translaziun da la Lia rumantscha elavurà la part rumantscha per diversas exposiziuns ed exequì numerusas incumbensas da translaziun per firmas privatas en connex cun projects da l'Expo.02.
La Lia rumantscha aveva inoltrà a l'Expo.01/02 differents projects che n'han la fin finala per differents motivs betg pudì vegnir realisads. In'exposiziun stabla en in pavigliun avess eventualmain attratg dapli attenziun e gì ina pli gronda irradiaziun ch'il project actual. Las finanzas han dentant mancà, uschia ch'ins ha stuì sa concentrar sin ina dimensiun pli modesta. La Lia rumantscha è dentant satisfatga dal dumber da visitadras e visitaders en il "Cirque des idées" e tar la "Carte postale". Il project "RUMANTSCH A L'Expo.02" è ì a fin cun success ed ha uschia pussibilità a la Rumantschia ed al rumantsch ina preschientscha digna, bufatga e tuttina represchentativa ed in pau speziala.
|
